As salaam aleyikum! Tumsifu Yesu Kristu! Bwana Yesu Asifiwe sana! Habari wadau wangu wa Blogu hii: Nilipata kupigiwa simu na mdau mmoja kutoka Songea, yeye ni rafiki yangu na nilikuwa nae pamoja shule O-level pale Ndanda Sekondari!
Alinipa kisa ambacho kama vile alikuwa ananiomba ushauri kwani yupo kwenye dilemma na nikamwambia ni bora nikiandike kwenye blog yangu ili watu wamsaidie mawazo naye akaridhia. Kisa chenyewe ni hiki kifuatacho;
Yeye alikuwa na rafiki wa kike (girl friend) hapo zamani kidogo wakati anasoma o-level, rafiki ambaye alikuwa anampenda sana na mpaka sasa kwa kuwa alishindwa kumsahau amebaini kuwa ndiye mwanamke anayempenda kuliko mwanamke yeyote aliyewahi kukutana nae maishani mwake. Rafiki yangu ni mwafrika pyua na yule msichana wake ni mchanganyiko wa kiarabu na kiafrika. Walikuwa wanaendelea na urafiki wao na yeye anadai alikuwa hakosi kwenda likizo kwao kwa kuhofia kumuudhi huyo rafikiye wa kike!
Walipishana miaka miwili kimadarasa ina maana wakati jamaa anamaliza kidato cha nne rafiki yake alikuwa kidato cha pili.
Urafiki wao ulikuwa kiasi kwamba hata familia zote mbili zilijua. Tatizo lilikuwa ni upande wa Mwanamke ambaye baba yake (mzee tajiri wa kiarabu) hakupenda kabisaaa jamaa awe ni mchumba kwa binti yake akiamini binti yake bado ni mdogo na haamini kama yale yalikuwa maamuzi sahihi kwa binti yake na pia mwanaume mwenyewe ni maskini wa kiafrika!
Binti hakujali, alionyesha msimamo wa hali ya juu kwa baba yake ikafikia mpaka jamaa aliwekwa ndani na baba yake yule binti kama vitisho tu ili aachane na binti yake!
Jamaa hali ilivyokuwa ngumu ilibidi ahame mji na kwenda mji mwingine wa mbali kutafuta maisha. Lakini baada ya miaka mitatu jamaa alirejea kwao na kupata tu taarifa kuwa yule mpenzi wake (yaani binti wa kiarabu) ameshaolewa na kijana wa kiarabu wapo Arusha. (ikumbukwe kipindi hicho mawasiliano kwa simu za viganjani ilikuwa ni kwa mafisadi tu) kwa hiyo jamaa alipoteza mawasiliano yote na yule dada.
Jamaa naye hakukaa sana kijijini aliamua kwenda Songea mjini kujiendeleza kimaisha! Miaka kumi sasa tangu mkasa huo utokee... Mengi yamefanyika! Jamaa alijiendeleza kishule na kupata taaluma nzuri na kazi nzuri na akafanikiwa kuoa na ana mtoto mmoja.
Wakati wa likizo yake ya Mwaka jana alipotembelea kijijini kwao kusalimia wazazi ndugu jamaa na marafiki aliambiwa pia yule mpenzi wake wa kiarabu alifika kwa ajili ya mazishi ya baba yake mzazi. Na pia alipata maelezo kuwa yule binti alienda mpaka kwa wazazi wa mshkaji kusalimia, aliongea sana na dada wa mshakaji na kuwaambia ni jinsi gani anavyomkumbuka na kumpenda mshkaji na ingawa mume aliyemuoa amezaa nae watoto wawili, na anamjali kwa hali na mali lakini sio chaguo lake!
Baada ya kupata maelezo hayo jamaa alipewa mpaka namba ya simu ambayo yule girl friend wake wa zamani aliiacha ili jamaa akija apatiwe wawasiliane, lakini jamaa aliichukua ile namba na alishindwa kuipiga kutokana na moyo wake kuwa mzito.
Likizo ya mwaka huu jamaa alienda tena kijijini peke yake na akafanikiwa kukutana na yule msichana wake wa kiarabu, kumbe naye alikuja kusalimia. Na safari hii jamaa alienda likizo peke yake bila familia yake, na yule binti naye alikwenda peke yake bila mumewe na wakakutana bila kupanga!
Ilikuwa ni huzuni sana kwa jamaa, kwani walipokutana wote walilia sana. Jamaa anakubali kuwa anampenda sana yule binti ambaye ni mke wa mtu sasa, na yule binti bado anampenda sana jamaa ambaye sasa ni mume wa mtu!(ngoma droo). Kasheshe ni kwamba mwanamke akija pale kijijini anashinda nyumbani kwa jamaa na anasaidia kazi zote za nyumbani akishawishi jamaa kwamba yeye yupo tayari aachane na mumewe yule wa kiarabu ili aolewe na jamaa. Na jamaa anakiri kuwa kweli anampenda huyu msichana na kikwazo kilikuwa mzee wake ambaye sasa ni marehemu, lakini yeye ameshaoa na mkewe hajawahi kumtendea kosa lolote na wana mtoto na wameshafanya vitu vingi vya maendeleo, wamejenga wana magari na vitega uchumi kadhaa kwa muda mchache tu baada ya kuoana.
Yule msicha anasisitiza mbona yeye ameolewa na yupo tayari aachane na mume wake? basi kama yeye hawezi kuachana na mke wake basi yeye yupo tayari kuwa mke wa pili!!!!!!! yaaani jamaa asiachane na mkewe ila yule mwanamke yupo tayari aachane na mumewe ili awe mke wa pili kwa jamaa.
Jamaa hayupo tayari kuwa na wake wawili, ni kweli yule msichana anampenda zaidi kuliko mke aliyenaye. Lakini pia mke wake hana hatia na hajawahi kumkosea hata siku moja katika maisha yake!! Jamaa amechanganyikiwa na hajui afanye nini. Wadau msaidieni. Na majibu ya mawazo yetu tumeni kupitia blogu hii ili kumsaidia.
Natanguliza shukrani!
